გალერეა

ივანე ჯავახიშვილის სახელობის თბილისის სახელმწიფო უნივერსიტეტში "თიბისის ბანკის" პროექტის - „ქართულად“ წარდგენა გაიმართა. პროექტის პარტნიორია ივანე ჯავახიშვილის სახელობის თბილისის სახელმწიფო უნივერსიტეტის „ლექსიკოგრაფიული ცენტრი“, რომელიც პროექტში 50 000 ინგლისურ-ქართული წინადადებით იღებს მონაწილეობას.

თსუ ბიბლიოთეკამ დაწყებითი კლასების სკოლის მოსწავლეებს უმასპინძლა. ღონისძიებაზე სტუმრად მოსულ ბავშვებს ცნობილი მწერლის ასტრიდ ლინდგრენის ლიტერატურული პერსონაჟები დახვდნენ, გაიმართა ზღაპრების ხმამაღალი კითხვა და სხვადასხვა გასართობი აქტივობები. თსუ ბიბლიოთეკის მარო მაყაშვილის სახელობის დარბაზში გაიხსნა სამკითხველო დარბაზი პატარა მკითხველისთვის ,,მომავლის ბიბლიოთეკა," რომელიც კვირაში ერთხელ მიიღებს ბავშვებს საყვარელი მწერლების სამყაროში.

თსუ ეკონომიკისა და ბიზნესის ფაკულტეტის ბიზნესის ადმინისტრირების საგანმანათლებლო პროგრამის სტუდენტები საერთაშორისო აუდიტორულ-საკონსულტაციო კომპანია „გრანთ თორნთონში“ პრაქტიკას გაივლიან. თბილისის სახელმწიფო უნივერსიტეტსა და კომპანია „გრანთ თორნთონს“ შორის თანამშრომლობის მემორანდუმი გაფორმდა, რომელსაც ხელი თსუ რექტორმა გიორგი შარვაშიძემ, კომპანია „გრანთ თორნთონის“ მმართველმა პარტიონ/დირექტორმა ვახტანგ ცაბაძემ და დირექტორმა ქეთევან ღამბაშიძემ მოაწერეს.

ივანე ჯავახიშვილის სახელობის თბილისის სახელმწიფო უნივერსიტეტსა და საქართველოს პოლიტიკის ინსტიტუტს (GIP) შორის თანამშრომლობის მემორანდუმი გაფორმდა, რომელსაც ხელი თსუ რექტორმა გიორგი შარვაშიძემ და GIP დირექტორმა კორნელი კაკაჩიამ მოაწერეს. მემორანდუმი ითვალისწინებს მხარეების ერთობლივი ძალისხმევით სამეცნიერო-კვლევითი საქმიანობის ხელშეწყობას, ერთობლივი პროექტების დაგეგმვასა და განხორციელებას, თსუ სტუდენტების ჩართულობას საჯარო ლექციებსა და საზაფხულო სკოლებში.

ივანე ჯავახიშვილის სახელობის თბილისის სახელმწიფო უნივერსიტეტში, ადამიანის უფლებათა კვირეულის ფარგლებში, გაიმართა საჯარო ლექცია „ადამიანის უფლებათა ევროპული სასამართლოს საკონსულტაციო იურისდიქცია: ევროპული სასამართლოსა და ეროვნული სასამართლოების თანამშრომლობის პერსპექტივები და გამოწვევები“. ასევე, ჩატარდა სტატიათა კრებულის „ადამიანის უფლებათა დაცვა: კანონმდებლობა და პრაქტიკა” პრეზენტაცია.

თბილისის სახელმწიფო უნივერსიტეტის გუნდმა საერთაშორისო ჰუმანიტარული სამართლისა და ლტოლვილთა სამართლის საერთო ევროპული იმიტირებული პროცესის ჩემპიონატში წარმატებით ასპარეზობა ფინალისტის რანგში დაასრულა. შეჯიბრის საერთაშორისო რაუნდებს ლუბლიანას უნივერსიტეტმა (სლოვენია) უმასპინძლა. ღონისძიების ორგანიზატორები იყვნენ წითელი ჯვრის საერთაშორისო კომიტეტი, გაერო-ს უმაღლესი კომისარიატი ლტოლვილთა საკითხებში, სლოვენიის საკონსტიტუციო სასამართლო და ლუბლიანას უნივერსიტეტი.