გალერეა

ჟურნალ „ფილოსოფიურ-თეოლოგიური მიმომხილველის“ მე-7-8 ნომერი (2017-2-18 წწ)  პრეზენტაცია გაიმართა. ჟურნალის ახალი ნომერი მიეძღვნა ცნობილი ფილოსოფოსისა და ფსიქოლოგის აპოლონ შეროზიას 90 წლისთავს. 

სამეცნიერო ჟურნალში შესულია ახალი თარგმანები, ფილოსოფიურ- თეოლოგიური ტექსტები. 

ორენოვანი (ქართული და ინგლისური) ჟურნალი „ფილოსოფიურ-თეოლოგიური მიმომხილველი“ გამოდის 2011 წლიდან თსუ ჰუმანიტარულ მეცნიერებათა ფაკულტეტის ფილოსოფიის სასწავლო-სამეცნიერო ინსტიტუტის ბაზაზე. 

თბილისის ივანე ჯავახიშვილის სახელობის სახელმწიფო უნივერსიტეტში თედო უთურგაიძის ბოლო წიგნის "ქართული სამწერლობო ენის ისტორიული გრამატიკის საკითხები" წარდგინება გაიმართა.

წიგნი მოიცავს ქართული ენის ყველა ქვესისტემის გათვალისწინებით ფონეტიკური, მორფოლოგიური, სინტაქსური დონეების საკვანძო საკითხებს, რომლებიც გაანალიზებულია დიაქრონიული თვალსაზრისით.

ასევე წიგნში შეტანილია ქართული ენის კომპიუტერული მოდელირების მიხედვით დამუშავებული ცალკეული საკითხები ზმნის მორფოლოგიისა და მარტივი წინადადების მანქანური სინტაქსის შესახებ.

თბილისის სახელმწიფო უნივერსიტეტის მუზეუმის ორგანიზებით მოეწყო ფოტოხელოვან -  ნიკა ბედენაშვილის გამოფენა, რომელზეც წარმოდგენილი იყო ერთ ფოტოში ასახული თბილისის ძველი და თანამედროვე ხედები. დამთვალიერებელს საშუალება მიეცა ენახა, როგორ იცვლებოდა დედაქალაქი, მისი არქიტექტურა და ქუჩები წლების მანძილზე.

ივანე ჯავახიშვილის სახელობის თბილისის სახელმწიფო უნივერსიტეტის მედიცინის ფაკულტეტსა და პეკინის (ჩინეთი) უნივერსიტეტის საზოგადოებრივი ჯანდაცვის სკოლას შორის თანამშრომლობის მემორანდუმი გაფორმდა. მემორანდუმს ხელი თსუ რექტორმა გიორგი შარვაშიძემ და პეკინის უნივერსიტეტის საზოგადოებრივი ჯანდაცვის სკოლის ვიცე დეკანმა ვანგ ჟიფენგმა მოაწერეს ხელი. მემორანდუმის თანახმად,  განიხილება თსუ ინგლისურენოვანი სამაგისტრო პროგრამის „საზოგადოებრივი ჯანდაცვა“ (პროგრამის ხელმძღვანელი პროფ. ნინო ჩიხლაძე) ფარგლებში სტუდენტებისა და აკადემიური პერსონალის მობილობის და ერთობლივი კვლევითი პროექტების განხორციელების შესაძლებლობები. 

ივანე ჯავახიშვილის სახელობის თბილისის სახელმწიფო უნივერსიტეტში გაიმართება სამეცნიერო-პოპულარული ფილმის „4000“ საპრემიერო ჩვენება. ფილმი, რომელიც აკადემიკოს თინათინ ყაუხჩიშვილის 100 წლის იუბილეს ეძღვნება, ბერძნულ-ქართული ურთიერთობების ათასწლეულებზე მოგვითხრობს. 

ფილმის რეჟისორია ნინო ყოლანდარია, პროდიუსერი - მედეა აბულაშვილი, ოფიციალური კონსულტანტია რისმაგ გორდეზიანი.

ივანე ჯავახიშვილის სახელობის თბილისის სახელმწიფო უნივერსიტეტში გაიმართა თსუ ჰუმანიტარულ მეცნიერებათა ფაკულტეტის ემერიტუსი პროფესორის დამანა მელიქიშვილის 80 წლისთავისადმი მიძღვნილი საიუბილეო საღამო. თბილისის სახელმწიფო უნივერსიტეტში ხანგრძლივი და ნაყოფიერი სამეცნიერო-პედაგოგიური მოღვაწეობისათვის, თსუ რექტორმა გიორგი შარვაშიძემ ემერიტუსი პროფესორი დამანა მელიქიშვილი უნივერსიტეტის მედლით დააჯილდოვა. „ძალიან რთულია ისაუბრო ადამიანზე, რომელმაც მთელი თაობები აღზარდა. ის არის სახელგანთქმული მეცნიერი, ძალიან კარგი აღმზრდელი და გარდა ამისა, ენერგიული და დადებითი ადამიანი, რომელიც აფრქვევს პოზიტიურ ენერგიას. ასეთი ხალხი არის სახე ჩვენი უნივერსიტეტის. ვუსურვებ ქალბატონ დამანას დიდხანს სიცოცხლეს და ჩვენი უნივერსიტეტისა და ქვეყნისთვის კიდევ ბევრი საქმის კეთებას,“- განაცხადა გიორგი შარვაშიძემ.