გალერეა

ივანე ჯავახიშვილის სახელობის თბილისის სახელმწიფო უნივერსიტეტში ლტოლვილთა საერთაშორისო დღესთან დაკავშირებით, სახალხო დამცველის ადამიანის უფლებათა აკადემიამ UNHCR-თან ერთად  ღონისძიება გამართა. შეხვედრას გაეროს ლტოლვილთა უმაღლესი კომისარიატის ხელმძღვანელობა, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს წარმომადგენლები, საქართველოს სახალხო დამცველის პირველი მოადგილე ნათია კაციტაძე, პროფესორ-მასწავლებლები და სტუდენტები დაესწრნენ. ღონისძიებაზე საქართველოში ლტოლვილთა მდგომარეობაზე და არსებულ გამოწვევებზე ისაუბრეს.

ივანე ჯავახიშვილის სახელობის თბილისის სახელმწიფო უნივერსიტეტში თსუ საბავშვო უნივერსიტეტისა და აბიტურიენტთა სამსახურის ერთობლივი საზაფხულო სკოლა გაიხსნა. საზაფხულო სკოლის მიზანია მოსწავლეებში დამოუკიდებელი და კრიტიკული აზროვნების უნარების განვითარება. ღონისძიებაზე დაჯილდოვდნენ ესეების კონკურსისა და წაკითხულის გააზრების ტესტირებაში გამარჯვებულები. წარმატებული მოსწავლეები ნინო ქადაგიძე ჟვანიამ დაასაჩუქრა.

მაღალგამდიდრებული ურანის უკან დაბრუნების პროგრამიდან მიღებული გამოცდილების შესახებ ატომური ენერგიის საერთაშორისო სააგენტოს მე-11 ტექნიკურ შეხვედრაში თსუ რექტორის მოადგილემ მიხეილ ჩხენკელმა, 100-მდე წარმომადგენელმა-მაღალი რანგის პროფესიონალებმა სხვადასხვა სახელმწიფოს მარეგულირებელი ორგანოებიდან და კვლევითი რეაქტორებიდან მიიღეს მონაწილეობა. თსუ ელეფთერ ანდრონიკაშვილის ფიზიკის ინსტიტუტი აქტიურადაა ჩართული მაღალგამდიდრებული ურანის რეპატრიაციის პროგრამაში.  ინსტიტუტის საკვლევი რეაქტორიდან 1998 წელს იქნა გატანილი ბირთვული საწვავი. 2015 წლის ბოლოს ინსტიტუტმა საქართველოდან სარეკორდო დროში გაიტანა მაღალგამდიდრებული ურანის ბოლო პარტია. ტექნიკური შეხვედრის მიზანია მაღალგამდიდრებული ურანის უკან დაბრუნების პროგრამის ფარგლებში განხორციელებული რეპატრიაციიდან მიღებული გამოცდილების შესახებ დეტალური ინფორმაციის მიწოდება მონაწილე სახელმწიფოების წარმომადგენლებისათვის. 

ივანე ჯავახიშვილის სახელობის თბილისის სახელმწიფო უნივერსიტეტისა და გეორგ ეკერტის სახელობის საერთაშორისო სახელმძღვანელოების კვლევის ინსტიტუტის (ბერლინი) ორგანიზებით გაიმართა კონფერენცია: გერმანულ-ქართული დიალოგი ახალი ქართული საზოგადოებრივი მეცნიერების სახელმძღვანელოზე გერმანელი და ქართველი მეცნიერებისა და პედაგოგების მონაწილეობით. კონფერენცია მიეძღვნა გერმანიასა და საქართველოში საზოგადოებრივი მეცნიერების სწავლების პრობლემებს. კონფერენციის მხარდამჭერია გერმანიის საგარეო საქმეთა სამინისტრო.

ივანე ჯავახიშვილის სახელობის თბილისის სახელმწიფო უნივერსიტეტში პროექტის „ევროპული ღირებულებები რაჭის მაღალმთიან რეგიონში“ ფარგლებში სასწავლო-სამეცნიერო კონფერენცია გაიმართა. ღონისძიებაზე გამოვლინდა ესეების კონკურსის „საქართველოს ევროპული მომავალი“ სამი გამარჯვებული:ბარბარე უთმელიძე ("ქართული ღვინო - გზა ევროპისკენ") - საფრანგეთში საქართველოს სათვისტომოს ხელმძღვანელის ოთარ ზურაბიშვილის რჩეული, გიორგი ხომასურიძე ("საქართველოს მომავალი ევროპული გამოცდილების გაზიარებით") - თსუ რექტორის გიორგი შარვაშიძის რჩეული, ნინო მეტრეველი ("ევროკავშირში გაერთიანებით საქართველო შეძლებს გახდეს ეკონომიკურად ძლიერი და წარმატებული სახელმწიფო") - ჟიურის რჩეული. პროექტი „ევროპული ღირებულებები რაჭის მაღალმთიან რეგიონში“ თსუ სტუდენტური სამეცნიერო პროექტების კონკურსის ერთ-ერთი გამარჯვებულია.

ივანე ჯავახიშვილის სახელობის თბილისის სახელმწიფო უნივერსიტეტის ამერიკისმცოდნეობის ინტიტუტმა საქართველოში ამერიკის შეერთებული შტატების ელჩის მოადგილის ნიკოლას ბერლინერის საქართველოში საქმიანობის დაასრულებასთან დაკავშირებით გამოსამშვიდობებელი ღონისძიება გამართა. ნიკოლას ბერლინერთან შეხვედრას თსუ რექტორის მოადგილე მიხეილ ჩხენკელი, ამერიკისმცოდნეობის ინსტიტუტის ხელმძღვანელი ვასილ კაჭარავა,  პროფესორები, სტუდენტები დაესწრნენ.