გალერეა

ივანე ჯავახიშვილის სახელობის თბილისის სახელმწიფო უნივერსიტეტის რექტორმა გიორგი შარვაშიძემ საზაფხულო სკოლის მონაწილე უნგრელ სტუდენტებსა და ერაზმუს+-სა და ბილატერალური გაცვლითი პროგრამების ფარგლებში თსუ-ში 2016-2017 წლის გაზაფხულის სემესტრში მყოფ სტუდენტებს სერტიფიკატები გადასცა. 7-17 ივლისს თსუ-მ „საქართველოში უცხო ქვეყნის მოქალაქეთათვის სწავლების ხელშეწყობის პროგრამის“ ფარგლებში საქართველოს განათლებისა და მეცნიერების სამინისტროს და განათლების საერთაშორისო ცენტრის ორგანიზებით საზაფხულო სკოლას უმასპინძლა, რომელშიც სამი უნგრელი სტუდენტი მონაწილეობდა (პაზმანი პეტერის სახელობის კათოლიკური უნივერსიტეტი და ეტვეშ ლორანდის სახელობის უნივერსიტეტი).

ივანე ჯავახიშვილის სახელობის თბილისის სახელმწიფო უნივერსიტეტის ქართული ემიგრაციის მუზეუმს ამერიკაში მცხოვრებმა ცნობილმა ჟურნალისტმა რუსუდან წერეთელმა  საჩუქრად გადასცა ამერიკაში მოღვაწე ქართველი ემიგრანტის, მწერლისა და მოქანდაკის ჯორჯ (გიორგი) პაპაშვილის ავტოპორტრეტი. ღონისძიებას თსუ ქართული ემიგრაციის მუზეუმის თანამშრომლები, ჯორჯ პაპაშვილის შემოქმედებით დაინტერესებული პირები ესწრებოდნენ.

ივანე ჯავახიშვილის სახელობის თბილისის სახელმწიფო უნივერსიტეტში თსუ მედიცინის ფაკულტეტის სტუდენტებისათვის პორტოს უნივერსიტეტის ასოცირებულმა პროფესორმა ადრიანო ა. ბორდალომ წაიკითხა ლექციები წყლის ხარისხზე და დაავადებათა პრევენციაზე, იოდის დეფიციტით გამოწვეული დაავადებების ეპიდემიოლოგიაზე, ჯანმრთელობის უფლებასა და უსაფრთხო გარემოს საკითხებზე. პროფესორი ადრიანო ა. ბორდალო თსუ-ში ევროკომისიის მიერ დაფინანსებული ერაზმუს+ პროგრამის ფარგლებში სამუშაო ვიზიტით იმყოფობოდა. ვიზიტის ფარგლებში პროფესორი ადრიანო ა. ბორდალო შეხვდა მედიცინის ფაკულტეტის წარმომადგენლებს. შეხვედრისას დაისახა თანამშრომლობის გაგრძელების პერსპექტივები უახლოეს მომავალში როგორც აკადემიურ, ისე სამეცნიერო სფეროში.  
 

ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის საერთაშორისო სამართლის ინსტიტუტმა საერთაშორისო სისხლის სამართლის მართლმსაჯულების დღე სამეცნიერო კონფერენციით აღნიშნა. საერთაშორისო სამართლის ინსტიტუტი სამეცნიერო კონფერენციას „საერთაშორისო სისხლის სამართლის აქტუალური თეორიული და პრაქტიკული საკითხები“ ყოველწლიურად სისხლის სამართლის საერთაშორისო სასამართლოს წესდების „რომის სტატუტის“ ხელმოსაწერად გახსნის დღესთან (17 ივლისი) დაკავშირებით უკვე მეხუთედ მართავს.კონფერენცია საერთაშორისო სისხლის სამართლისა და მომიჯნავე დარგების აქტუალურ თეორიულ და პრაქტიკულ საკითხებს ეხებოდა და მასში თსუ-ს იურიდიული ფაკულტეტის საერთაშორისო სამართლის მიმართულების საბაკალავრო, სამაგისტრო და სადოქტორო საფეხურის ოცამდე სტუდენტი და მკვლევარი მონაწილეობდა. კონფერენციის დასასრულს, ყველა მონაწილეს სერტიფიკატი გადაეცა.

ივანე ჯავახიშვილის სახელობის თბილისის სახელმწიფო უნივერსიტეტის პროფესორი თინათინ მარგალიტაძე დამსწრეთა წინაშე მოხსენებით: „ჩემი აფრიკული შთაბეჭდილებები: ენობრივი, კულტურული, პიროვნული“ წარდგა. თინათინ მარგალიტაძე მივლინებით იმყოფებოდა სამხრეთ აფრიკის რესპუბლიკაში აფრილექსის, აფრიკის ლექსიკოგრაფთა ასოციაციის მიწვევით და მონაწილეობა მიიღო აფრილექსის 22-ე საერთაშორისო კონფერენციის მუშაობაში. მომხსენებელმა მსმენელებს გააცნო სამეცნიერო ანგარიში ჩატარებული კონფერენციის შესახებ და გაუზიარა თავისი შთაბეჭდილებები ქვეყნის შესახებ.

ივანე ჯავახიშვილის სახელობის თბილისის სახელმწიფო უნივერსიტეტის ფრანგულენოვანი საბაკალავრო პროგრამის „კომპიუტერული მეცნიერება“ კურსდამთავრებულებს ფრანგული ეროვნული დიპლომები (უნივერსიტეტი პარიზი 8) გადაეცათ. ფრანგულენოვანი საბაკალავრო პროგრამა „კომპიუტერული მეცნიერება“  საქართველოში 2002 წლიდან, თსუ-ში კი 2009 წლიდან მოქმედებს და 15 წლის განმავლობაში 100-ზე მეტი კურსდამთავრებული ჰყავს. სწავლის განმავლობაში სტუდენტები მინიმუმ ერთი სემესტრი უნივერსიტეტ პარიზი 8-ში სწავლობენ. კურსდამთავრებულთა 40-მა პროცენტმა მაგისტრატურის საფეხურზე სწავლა საფრანგეთსა და სხვა ფრანკოფონულ ქვეყანაში გააგრძელა. პროგრამა აკრედიტებულია საქართველოს განათლებისა და მეცნიერების სამინისტროსა და საფრანგეთის განათლების ეროვნული სამინისტროს მიერ, ფრანგული ენის გაღრმავებული სწავლების პირობით. სტუდენტებს ლექციებს ქართველ და ფრანგ ლექტორთა შერეული ჯგუფი უკითხავს.