გალერეა

თსუ-სა და საქართველოს ეროვნული ლატარიის კომპანიას შორის თანამშრომლობის მემორანდუმი გაფორმდა, რომელსაც ხელი თსუ რექტორმა გიორგი შარვაშიძემ და საქართველოს ეროვნული ლატარიის კომპანიის დირექტორმა გიორგი გედევანიშვილმა მოაწერეს. კომპანიამ სოციალური აქციის პირველ ადრესატებად თსუ სტუდენტები შეარჩია, რომლებიც გამოირჩევიან მაღალი აკადემიური მოსწრებით და ესაჭიროებათ ფინანსური მხარდაჭერა. კომპანია ორ სტუდენტს დაუფინანსებს 2018-2019 სასწავლო წლის სწავლის საფასურს.

წიგნის საერთაშორისო დღესთან დაკავშირებით ივანე ჯავახიშვილის სახელობის თბილისის სახელმწიფო უნივერსიტეტის ბიბლიოთეკაში სახალისო შემეცნებითი კვირეული - ,,ბავშვები უნივერსიტეტის ბიბლიოთეკაში" გაიხსნა. 23 აპრილიდან 27 აპრილის ჩათვლით, თსუ ბიბლიოთეკა უმასპინძლებს თბილისის სხვადასხვა სკოლის მოსწავლეებს. ცნობილი ქართველი ლიტერატორები და მხატვრები მოსწავლეებთან ერთად წაიკითხავენ ზღაპრებს და დახატავენ საყვარელ პერსონაჟებს.

ივანე ჯავახიშვილის სახელობის თბილისის სახელმწიფო უნივერსიტეტში საქართველოს დამოუკიდებელი რესპუბლიკის და უნივერსიტეტის 100 წლის იუბილესადმი მიძღვნილი ლექციათა ციკლი გახსნეს: თსუ რექტორმა გიორგი შარვაშიძემ - „საუნივერსიტეტო განათლება საქართველოში“ და თსუ ბიბლიოთეკის ხელმძღვანელმა ზურაბ გაიპარაშვილმა-„პირველი ქართული უნივერსიტეტი 1918-1921“. ღონისძიებაზე თსუ მუზეუმმა წარმოადგინა ივანე ჯავახიშვილის დაბადების დღისადმი მიძღვნილი ექსპოზიცია, სადაც გამოფენილი იყო იშვიათი რარიტეტები, ფოტოდოკუმენტური და მემორიალური ნივთები.

დედამიწის დაცვის საერთაშორისო დღესთან დაკავშირებით, თსუ ფსიქოლოგიისა და განათლების მეცნიერებათა ფაკულტეტის დაწყებითი განათლების სტუდენტებმა წყნეთის მიმდებარე ტერიტორია დაასუფთავეს. აქციის ფარგლებში, ჩატარდა საჯარო ლექცია თემაზე: ეკოლოგია და გარემოს დაცვა. ასევე, დაგეგმილია პირველი კორპუსის ეზოში სიმბოლურად, მარადმწვანე ხის დარგვა.

ივანე ჯავახიშვილის სახელობის თბილისის სახელმწიფო უნივერსიტეტის ზუსტ და საბუნებისმეტყველო მეცნიერებათა ფაკულტეტისა და სან დიეგოს სახელმწიფო უნივერსიტეტი-საქართველოს ორგანიზებით თბილისისა და რეგიონების საჯარო და კერძო სკოლების XI-XII კლასის მოსწავლეებისათვის ყოველწლიური ელექტრონული ოლიმპიადის: ,,მეცნიერების თასი-2018“ ფინალური ტური გაიმართა და წინა ეტაპებზე შერჩეული 13 საუკეთესო გუნდიდან ერთი გამარჯვებული გამოვლინდა.

ივანე ჯავახიშვილის სახელობის თბილისის სახელმწიფო უნივერსიტეტში საერთაშორისო სამეცნიერო კონფერენცია „ჰეიდარ ალიევი: მულტიკულტურალიზმისა და ტოლერანტობის იდეოლოგია“ გაიხსნა. კონფერენცია მიეძღვნა აზერბაიჯანის სახელმწიფოებრივი დამოუკიდებლობის შემქმნელის, ჰეიდარ ალიევის დაბადებიდან 95-ე წლისთავს.