ENG / GEO
ახალი ამბები განათლება მეცნიერება კულტურა და სპორტი თსუ მედიაში გალერეა მულტიმედია

გაიმართა პროფესორ ლევან ალექსიძის საპატივცემულოდ მოწვეული საერთაშორისო სიმპოზიუმი

ივანე ჯავახიშვილის სახელობის თბილისის სახელმწიფო უნივერსიტეტის საერთაშორისო სამართლის ინსტიტუტის, ლონდონის პოლიტიკურ და ეკონომიკურ მეცნიერებათა სკოლისა (LSE) და მელბურნის უნივერსიტეტის თანამშრომლობით, პროფესორ ლევან ალექსიძისადმი მიძღვნილი საერთაშორისო სიმპოზიუმი გაიმართა.

სიმპოზიუმი გახსნა თბილისის სახელმწიფო უნივერსიტეტის პროფესორმა ქეთევან ხუციშვილმა, რომელმაც თანამედროვე საერთაშორისო სამართლის შექმნისა და განვითარების პროცესში პროფესორ ლევან ალექსიძის წვლილზე ისაუბრა.  ამასთან, ხაზი გაუსვა საქართველოს დამოუკიდებლობის აღდგენის, დამოუკიდებელი საქართველოს კონსტიტუციის შექმნისა და საქართველოს საერთაშორისო ორგანიზაციებში გაწევრიანების საქმეში აკადემიკოს ლევან ალექსიძის მოღვაწეობის მნიშვნელობას, ქართული საერთაშორისო სამართლის სკოლის დაფუძნებისა და თსუ-ს ფარგლებში საერთაშორისო სამართლისა და საერთაშორისო ურთიერთობების ფაკულტეტის შექმნის კვალდაკვალ.

მისასალმებელი სიტყვა წარმოთქვა თსუ რექტორის მოადგილემ მიხეილ ჩხენკელმა, რომელმაც აღნიშნა პროფესორ ლევან ალექსიძის განსაკუთრებული ძალისხმევა უნივერსიტეტის საერთაშორისო მასშტაბით აღიარების პროცესში.

აკადემიკოს ლევან ალექსიძის დამსახურებასა და მის წვლილზე საერთაშორისო სამართლის განვითარებაში, მათ შორის „ცივი ომის“ პერიოდში, ისაუბრეს ისეთმა საერთაშორისოდ აღიარებულმა და ამ ღონისძიებისათვის სპეციალურად საქართველოში მოწვეულმა მეცნიერებმა, როგორებიც არიან ლონდონის პოლიტიკურ და ეკონომიკურ მეცნიერებათა სკოლის პროფესორი გერი სიმფსონი, ლონდონის უნივერსიტეტის პროფესორი მეთიუ ქრეივენი, მელბურნის უნივერსიტეტის პროფესორი სუნდჰია პაჰუჯა, ლონდონის უნივერსიტეტის პროფესორი სკოტ ნიუტონი და სხვა.

სიმპოზიუმი გაგრძელდა „ცივი ომის“ დროინდელ საერთაშორისო სამართალსა და განსაკუთრებით აკადემიკოს პროფესორ ლევან ალექსიძის ამ პერიოდში მოღვაწეობაზე მსჯელობით.

პროფესორი ლევან ალექსიძე ეკუთვნის მეცნიერთა იმ მცირე ჯგუფს, რომელიც ღირებულებების დაპირისპირების პერიოდშიც პოულობდა და ინარჩუნებდა ერთიან იდეოლოგიას საერთაშორისო სამართლისათვის პრინციპულად მნიშვნელოვან საკითხებზე. მისი უშუალო ძალისხმევითა და ჩართულობით, სწორედ „ცივი ომის“ პერიოდში, შემუშავდა ადამიანის უფლებების დაცვის ძირითადი საერთაშორისო ინსტრუმენტები გაეროს ფარგლებში. ხაზი გაესვა იმ ფაქტს, რომ პროფესორი ალექსიძე იყო პირველი სოციალისტური ბლოკიდან, რომელიც ლექციის წასაკითხად ჰააგის საერთაშორისო სამართლის აკადემიაში მიიწვიეს ცივი ომის დროს.

სიმპოზიუმის ფარგლებში აქტიური დისკუსია საერთაშორისო და ქართული აკადემიური სექტორის წარმომადგენლებისა და თსუ სტუდენტების რამდენიმე თაობის ჩართვით გაგრძელდა.

ღონისძიებით გაიხსნა თსუ საერთაშორისო სამართლის ინსტიტუტის 2017-2018 სასწავლო წლის საჯარო ლექციების წყება. ასევე, ეს პირველია ღონისძიებათა ციკლში, რომელიც „ცივი ომის“ დროინდელ საერთაშორისო სამართალს ეძღვნება და თსუ-სთან ერთად, 14-17 სექტემბერს,  საქართველოს საგარეო საქმეთა სამინისტრო და მწერალთა სახლი მასპინძლობს.

იხილეთ გალერეა
სხვა სტატიები »

 
სიახლეების გამოწერა
გამოწერის გაუქმება