ENG / GEO
ახალი ამბები განათლება მეცნიერება კულტურა და სპორტი თსუ მედიაში გალერეა მულტიმედია

საერთაშორისო სამართლის ინსტიტუტი საერთაშორისო თანამშრომლობას აძლიერებს

ივანე ჯავახიშვილის სახელობის თბილისის სახელმწიფო უნივერსიტეტის საერთაშორისო სამართლის ინსტიტუტმა სასწავლო კურსი - მიგრაციის აქტუალური პრობლემები და ევროკავშირის სტანდარტები - 2009 წლიდან დანერგა. აღნიშნულს წინ უძღოდა სამაგისტრო საფეხურის სტუდენტებისათვის ადამიანით ვაჭრობასა (ტრეფიკინგი) და ოჯახში ძალადობასთან ბრძოლის საერთაშორისო სტანდარტების  შესახებ კურსის შემოღება. ინსტიტუტის ფარგლებში განხორციელებულ კვლევებსა და სწავლებას ამ მიმართულებით  პროფესორი ქეთევან ხუციშვილი უძღვებოდა.

განხორციელებული აქტივობები მიგრაციის პოლიტიკის განვითარების საერთაშორისო ცენტრთან (ICMPD) აქტიური თანამშრომლობის ფარგლებში ხორციელდებოდა, რომელიც ვენაში დაფუძნებული ორგანიზაციაა და აქტიურად უჭერს მხარს მიგრაციასა და თავშესაფართან დაკავშირებულ საკითხებზე მრავალმხრივ თანამშრომლობას. გაერთიანებული ერების ორგანიზაციის მიგრაციის საერთაშორისო საგენტოს, სხვადასხვა სამთავრობო და არასამთავრობო ორგანიზაციებთან თანამშრომლობის შედეგად, შემუშავდა სასწავლო კურიკულუმი და სხვა აქტივობები საერთაშორისო სამართლის ინსტიტუტის სტუდენტებისა და აკადემიური სექტორისათვის.

თანამშრომლობის დამყარების ერთ-ერთ ეტაპს წარმოადგენდა საერთაშორისო სამართლის ინსტიტუტისათვის მიგრაციის საკითხებზე სამეცნიერო ლიტერატურის გადმოცემა, 2014 წელს ივანე ჯავახიშვილის სახელობის თბილისის სახელმწიფო უნივერსიტეტსა და მიგრაციის საკითხთა სამთავრობო კომისიას შორის გაფორმებული მემორანდუმის საფუძველზე, რაც, თავის მხრივ, საქართველოს 2016-2020 წლების მიგრაციის სტრატეგიის სამოქმედო გეგმით გათვალისწინებული აქტივობის - სამთავრობო უწყებებსა და აკადემიურ სექტორს შორის თანამშრომლობის გაძლიერება - შემადგენელი ეტაპია. აღნიშნული ხელს შეუწყობს საქართველოში მიგრაციის მართვის საკითხებზე ცნობიერების ამაღლებას, შესაძლებლობების გაძლიერებას, სტრატეგიების შემუშავებასა და ინტერდისციპლინური კლვევების წარმოებას.

პროფესორმა ლევან ალექსიძემ, საქართველოს მეცნიერებათა  ეროვნული აკადემიის ნამდვილმა წევრმა, მადლობა გადაუხადა მიგრაციის პოლიტიკის განვითარების საერთაშორისო ცენტრსა და მიგრაციის საკითხთა სამთავრობო კომისიის სამდივნოს საერთაშორისო სამართლის ინსტიტუტის ბიბლიოთეკისათვის სახელმძღვანელოების გადმოცემისთვის. სულ ბიბლიოთეკას 60 სახელმძღვანელო გადაეცა. აღნიშნულმა ლიტერატურამ ხელი უნდა შეუწყოს სხვადასხვა დისციპლინის სტუდენტების უნარებისა და შესაძლებლობების განვითარებას, ასევე, მრავალმხრვი კვლევითი საქმიანობის შესაძლებლობას მიგრაციის გლობალურ ფენომენთან დაკავშირებით. მიგრაციის პოლიტიკის განვითარების საერთაშორისო ცენტრმა რიგი აქტივობები მიუძღვნა საკითხის ირგვლივ ფართო დისკუსიისა და ცნობიერების ამაღლებას საქართველოს სამეცნიერო წრეებში.

სხვა სტატიები »

 
სიახლეების გამოწერა
გამოწერის გაუქმება